Bydd llwybr goleuni newydd yn ganolbwynt i’r Nadolig yng Nghaerdydd eleni gydag 11 gosodiad yn lansio ddydd Iau 14 Tachwedd.

Mae llwybr Goleuni’r Gaeaf, a gyflwynir gan FOR Cardiff, yn weithgaredd cyffrous am ddim a gynhelir rhwng 14 Tachwedd a 5 Ionawr, yn arwain ymwelwyr o amgylch y ddinas dros gyfnod yr ŵyl.

Fel rhan o lwybr Goleuni’r Gaeaf, bydd Sgwâr Canolog Caerdydd yn cael ei drawsnewid gyda thafluniad gweledol a sain o’r enw Awrora Caerdydd a fydd yn goleuo wyneb Gorsaf Caerdydd Canolog rhwng 5pm a hanner nos bob nos.

Comisiynwyd Awrora Caerdydd ar ran FOR Cardiff ym Mharc Bute, a bydd yn adrodd hanes noson o aeaf wrth i drenau o’r gorffennol a’r dyfodol gludo ymwelwyr o goedwigoedd Cymru i oleuadau disglair Caerdydd. Bydd y tafluniad a ddyluniwyd gan artistiaid mapio taflunio Illuminos gyda darluniau gan bedwar artist o Gymru, sef Sahar Saki, Jack Skivens, Frank Duffy, a Beth Blandford, yn adrodd hanes celfyddyd, traddodiad a llên gwerin Cymru.

Bydd y profiad goleuni a sain rhyngweithiol, Illuminated Reeds Symphony, hefyd yn dychwelyd i gamlas gyflenwi dociau Caerdydd am yr ail flwyddyn. Mae’r gosodiad, a ddyluniwyd gan artistiaid o Gymru ac a gomisiynwyd ar ran FOR Cardiff ym Mharc Bute, yn dynwared cyrs yn arnofio ar ddŵr, gyda goleuadau LED a synau cefn gwlad Cymru yn dod yn fyw pan fyddwch yn neidio, troedio neu ddawnsio ar badiau rhyngweithiol ar y llawr.

Bydd arcedau Fictoraidd ac Edwardaidd Caerdydd hefyd yn cael eu trawsnewid fel rhan o lwybr Goleuni’r Gaeaf. Cafodd y cynllun goleuadau Nadoligaidd ei gyflawni diolch i gyllid gan Gronfa Ffyniant Gyffredin Llywodraeth y DU. Bydd arcedau hanesyddol Caerdydd yn cael eu haddurno gyda llusernau, goleuadau a garlantau Nadoligaidd wedi’u hysbrydoli gan dreftadaeth 19eg ganrif yr adeiladau fel rhan o’r gosodiad.

Bydd llwybr Goleuni’r Gaeaf yn cael ei oleuo am y tro cyntaf nos Iau 14 Tachwedd, gan sbarduno tri diwrnod o ddathliadau i nodi dechrau’r Nadolig yng Nghaerdydd.

Am 5pm ddydd Iau 14 Tachwedd, bydd gosodiad goleuadau Nadolig Cardiff Kids a ddyluniwyd gan ddisgyblion Ysgol Gynradd St Cuthbert, Tre-biwt, yn cael ei ddatgelu ar Stryd y Frenhines, Caerdydd, a bydd Awrora Caerdydd yn cael ei oleuo’n fuan wedyn am 6.30pm. Bydd bandiau pres, cerddwyr ar stiltiau, diddanwyr plant a pherfformwyr golau LED yn diddanu’r dorf yn y Sgwâr Canolog, Yr Aes, Stryd y Frenhines a’r Stryd Fawr.

Nos Wener 15 Tachwedd, bydd Marchnad Nos Caerdydd yn dychwelyd fel rhan o’r digwyddiad Dinas yr Arcedau: Caerdydd ar ôl iddi nosi. Am un noson yn unig, bydd Marchnad Caerdydd ar agor tan 9pm, a bydd siopau, bariau a bwytai yng nghanol dinas Caerdydd yn cynnal digwyddiadau unigryw gyda’r nos, o flasu sieri i wneud siocled.

Ddydd Sadwrn, 16 Tachwedd, bydd Diwrnod Dinas yr Arcedau yn dychwelyd gyda theithiau tywys, cynigion arbennig a digwyddiadau mewn siopau. Mae Diwrnod Dinas yr Arcedau a lansiwyd yn 2019 wedi ennill nifer o wobrau cenedlaethol a rhyngwladol ac wedi denu miloedd o ymwelwyr i brif ddinas Cymru. Gallwch weld yr holl ddigwyddiadau yma https://www.thecityofarcades.com/2024

Meddai Emily Cotterill, Cyfarwyddwr Cyswllt FOR Cardiff:

“Mae’r Nadolig bob amser yn gyfnod cyffrous yng Nghaerdydd, gyda chymaint i’w weld a’i wneud i bobl o bob oedran.

“Eleni, rydym ni wrth ein bodd ein bod wedi gallu creu rhywbeth newydd gyda goleuadau’r Nadolig sy’n cyfuno’r gorau sydd gan y ddinas i’w gynnig dros y Nadolig, ynghyd â llu o ddigwyddiadau am ddim i bawb allu eu mwynhau. Bydd yr arddangosiad yn y Sgwâr Canolog yn rhoi cyfle i ymwelwyr sy’n cyrraedd Caerdydd ar y trên a’r bws gael golwg ddisglair ar y ddinas.

“Gobeithiwn y bydd yr holl ddigwyddiadau hyn yn annog mwy o bobl i archwilio’r ddinas a phopeth sydd ganddi i’w gynnig dros dymor y gaeaf.”

Meddai Natalie Isaac, cyfarwyddwr Forty Four Group:

“Mae Diwrnod Dinas yr Arcedau bob amser yn achlysur gwych gan ei fod yn denu pobl newydd i ganol y ddinas. Mae pobl yn edrych ar fusnesau newydd nad oeddent wedi’u gweld o’r blaen o ganlyniad i gynigion arbennig a digwyddiadau.

“Gwyddwn fod pobl yn ceisio arbed arian ar gyfer y Nadolig ar yr adeg hon o’r flwyddyn, ond mae’n braf gweld pobl yn dod allan i ymweld â chanol y ddinas anhygoel hon. Y llynedd, roedd pobl wrth eu bodd gyda’n cynnig brecwast, ac fe wnaeth y cynnig annog pobl i ddod i mewn i flasu ein bwyd, gan ein helpu i ddenu cwsmeriaid newydd.

Gall ymwelwyr ddarganfod mwy am y Nadolig yng Nghaerdydd drwy fynd i wefan Croeso Caerdydd.

Bydd map Llwybr Goleuo’r Gaeaf ar gael i’w lawrlwytho o 11 Tachwedd, gyda chopïau caled ar gael mewn lleoliadau penodol ar draws y ddinas.